Barzanî û Kazimî rewşa Iraqê guftûgo kirin

Li yekem wêstgeha serdana xwe ya Bexdayê, berî nîvroya îro çarşem 02/09/2020 birêz Nêçîrvan Barzanî Serokê Herêma Kurdistanê, li gel birêz Mistefa Kazimî Sero‌k Wezîrê Iraqa Federal civiya.

Li civînê de rewşa siyasî û emnî ya Iraqê, pejika virusa Korona û encamên wê yên bi taybetî li warên aboriyê da û hewlên rûbirûbûna wê, berdewamiya guftûgoya Hewlêr – Bexda ya ji bo çareserkirina kêşeyan, metirsiyên terorê û tevgerên Da’îş, rewşa navçeyê bi giştî û çend pirseke ji bo her du aliyan girîngbûn hate guftûgo kirin.

Li civînê de ku birêzan Cîgirên Serokê Herêma Kurdistanê amade bûn, her du alî tekez li ser girîngî û pêwîstiya karê pêkveyî û hevbeşiya hemû pêkhat û aliyan ji bo rûbirûbûna gefan û derbaskirina qeyranan kirin. Her du alî kok bûn li ser girîngiya alîkarî û hemahengiya Pêşmerge û artêşê ya ji bo rûbirûbûna metirsiyên terorê û piştrastbûna li nehiştina Da’îş.

Di derbarê kêşeyên Hewlêr – Bexda jî Serok Nêçîrvan Barzanî û Mistefa Kazimî Serok Wezîr dakokiyê li ser berdewamiya guftûgoyan ji bo gihîştina bi rêkeftineke giştgîr ya yekcariya çareserkirina tevahiya kêşeyan li ser bingeha destûr û hevkariya di navbera Hikûmeta Federal û Hikûmeta Herêma Kurdistanê ji bo derbaskirina qeyranan kir.

Birêz Kazimî balkişand li ser girîngiya binyatnana baweriyê û ragihand berê li babeta muamelekirina li gel kêşeyan kêmasî hebûn û hêvî xwest her du alî bikarin bi nêrîneke nû ya hevbeş hengavên ji bo çareseriyê bavêjin. Ji aliyê xwe ve Serok Nêçîrvan Barzanî jî dûpat kir ku çareserkirina bingehîn û yekcariya kêşeyan li berjewendiya tevahiya Iraqê daye û aramiyê ji bo welat vedigerîne.

Peywendiyên Iraq û Herêma Kurdistanê li gel welatên cîran û hevsû, parastina tixûban û serweriya Iraqê, serdana Serok Wezîr ya Washingtonê û civîna li gel Serokê Amerîka, serdana Serokê Fransa ya Iraqê û erkê hevpeymaniya navdewletiya dijî Da’îş, mijareke dinê civînê bûn. Serok Nêçîrvan Barzanî balkişand li ser wê yekê ku civaka navdewletî amadeye hevkarî û piştevaniyê li Iraqê bike, girînge Iraqî jî bikarê sûd ji wê derfetê bibîne.

Nerîna min :