Barzanî: Pêwîstiya YNK û PDKê zêdetir bi rêkeftina stratejîk heye
Serokê Kurdistanê Mesûd Barzanî bi serokatiya heyeteke polîtbûroya Partiya Demokrata Kurdistanê (PDK) serdana bajarê Silêmaniyê kir û digel serokatiya Yekêtiya Niştimaniya Kurdistanê (YNK) civiya.
Piştî civînê, serok Barzanî di preskinfrensekê de behsa naveroka civînê kir û bersiva pirsên rojnamevanan da.
Di pireskonfrensê de serok Mesûd Barzanî basa naveroka civîna xwe ya bi her du polîtbûroyên YNK û PDK re kir û got ku, serdana wan bo Silêmaniyê û civîna hevbeşa her du polîtbûroyan gihandina peyama biratî û bihevrekarkirinê ye:
– Hatina me bo Silêmaniyê gihandina wê peyamê ye ku, em bi we re ne û em amadene ji nuha û pêve jî di hemû pirsan de digel we bin.
Serok Barzanî di axaftina xwe de behsa rola Celal Talebanî kir û got:
– Hebûna Celal Talebanî ne tenê ji bo YNKê giringe, lê ew ji bo PDKê, ji bo hemû partîyên Kurdistanî û gelê Kurdistanê jî giring e. Înşalah bi xweşî û selametî dê vegere bo Kurdistanê.
– Lê belê divê em hemû egeran jî li ber çavan deynîn, ji ber ku, nexweşîya wî cidî ye.
Serok Barzanî got ku, ji bo paşeroja Kurdistanê, yekrêzî û yekhelwestiya YNKê û PDKê û hevpeymanîya navbera YNKê û PDKê û hemû hêzên siyasîyên Kurdistanê gelek giring e û:
– Em bi vê dikarin destkevtên xwe biparêzin û destkevtên din jî bi dest bînin.
Di bersiva pirsekê de li dor rewşa aloza navbera Hewlêr û Bexdayê, serokê Kurdistanê got:
– Em hertim digel danûstandinan de bûne û tu demekê jî me dergehê diyalogê negirtiye. Di çend rojên bê de jî civînek din a serbazî, teknîkî di navbera her du alîyan de tê encam dan. Bê goman vekişîna pêşmerge girêdayî bi vekişîna hêzênarteşaIraqê ve girêdayî ye.
Li dor paşeroja rêkevtinnameya stratejîk a navbera PDK û YNKê de piştî nexweşîya serok Talebanî, Barzanî got:
– Wek wezîfeyek exlaqî û niştîmanî li ser me her du alîyan feriz dike ku, weke caran û zêdetir pabendî vê rêkevtina stratejîk bîn.
