Serokwezîrê Îsraîlê Benjamin Netanyahu red kir ku hewl bide Serokê Amerîkayê Donald Trump razî bike ku êrîşên xwe yên li ser Îranê bidomîne, û got ku biryara çawaniya danûstandina bi Tehranê re di destê wî de ye. Wî her wiha hişyariyek tund da Îranê û pêşbînî kir ku rejîma wê hilweşe.
Serokwezîrê Îsraîlê Benjamin Netanyahu got, “Dewletên Yekbûyî yên Amerîkayê şirîkê herî mezin e. Me bi eşkereyî hemî vebijarkên danûstandina bi Îranê re nîqaş kirine, lê di dawiyê de biryar biryara Trump e û kes jê re nabêje çi bike.” Netanyahu her wiha gotegotên ku dibêjin Îsraîl dixwaze Trump bikişîne nav şer an jî wî bixe şaşiyê red kir.
Netanyahu li ser îhtîmala peymanek dîplomatîk bi Tehranê re got, “Îranî her tim derewan dikin, dixapînin û demê winda dikin.” Wî got ku armanca wî û ya Trump a sereke ew e ku rê li ber rejîma Îranê bigirin ku çekên navokî bi dest nexe.
Serokwezîrê Îsraîlê bawer dike ku Îran ji her demê qelstir e û Îsraîl jî xurttir e, her çend wî qebûl kir ku rejîma Îranê piştî pênc mehan şer hîn hilneweşiyaye, lê pêşbînî kir ku ew “di dawiyê de hilweşe. Wî hişyar kir ku ger Îran êrîşî Îsraîlê bike, ew ê “xeletiyek kujer bike û em ê pir bi tundî bersiv bidin.”
Netanyahu got, “Ez nafikirim ku Tengava Îsraîl heta hetayê wekî kartek zextê bimîne ji ber ku boriyên enerjiyê dê ber bi Deryaya Sor û ji wir ber bi Îsraîlê ve li Deryaya Spî werin veguhastin. Em ê vê xeniqînê biqedînin.”
Der barê kêmbûna piştgiriya Amerîkayê ya ji bo Îsraîlê de, Netanyahu fikarên xwe anî ziman û got ku ev yek bi kampanyayên şaş ên medyaya civakî û karanîna “botan” ji hêla hin welatan ve girêdayî ye. Wî bang li her du partiyên sereke yên Amerîkî (Komarparêz û Demokrat) kir ku piştgiriya Îsraîlê wekî prensîbek ewlehiya neteweyî ya welatê xwe bidomînin.
