Serokê Hikûmeta Herêma Kurdistanê û Wezîrê Enerjî û Çavkaniyên Xwezayî yê Tirkiyeyê li ser nehêlana hemî asteng û berbestên di rêya hinardekirina petrola Herêma Kurdistanê bi rêya benderê Ceyhanê de bi zûtirîn dem hevnerîn bûn.
Serokê Hikûmeta Herêma Kurdistanê Mesrûr Barzanî îro (Yekşem, 16.03.2025) pêşwaziya Wezîrê Enerjî û Çavkaniyên Xwezayî yê Tirkiyeyê Alparslan Bayraktar û şanda pê re kir.
Di wê civînê de, danûstandin li ser pêşxistina peywendiyên Herêma Kurdistanê û Tirkiyeyê û xasma di warê enerjiyê de hatin kirin.
Herwesa her du alî li ser nehêlana hemî asteng û berbestên di rêya hinardekirina petrola Herêma Kurdistanê bi rêya benderê Ceyhanê de bi zûtirîn dem hevnerîn bûn.
Fermangeha Peywendiyên Derve ya Hikûmeta Herêma Kurdistanê îro (Yekşem, 16.03.2025) di ragehandinekê de amaje da, “Wezîrê Enerjî û Çavkaniyên Xwezayî yê Tirkiyeyê Alparslan Bayraktar bi hevaltiya Balyozê Tirkiyeyê li Îraqê û şandeke bilind re bi serdaneke fermî gehişt Hewlêrê.”
Wê çavkaniyê herwesa ragehand, “Biryar e Wezîrê Enerjiyê û Çavkaniyên Xwezayî yê Tirkiyeyê bi berpirsên bilind ên Herêma Kurdistanê re bicive.”
