Îran bi rêya Umanê bersiva nameya Trump dide
Tehranê bersiva nameya Serokê Amerîkayê Trump ji rêberê Îranê Xamineyî re şandî da. Wezîrê Karên Derve yê Îranê Erakçî der barê nameya ku bi rêya Umanê hatiye şandin de got, “Siyaseta me ew e ku di bin zext û gefa herî zêde ya leşkerî de rasterast muzakere neyên kirin, lê danûstandinên nerasterast dikarin bidomin.”
Li gorî nûçeya ajansa fermî ya Îranê IRNAyê, Erakçî diyar kir ku, ew ê di bin gef û zextên leşkerî de rasterast bi DYA’yê re nekevin danûstandinan, lê dibe ku hevdîtinên nerasterast ên beriya niha bidomin.
Medyaya Îranê ji zarê Arakçî ragihand: “Bersiva fermî ya Îranê ji nameya Serokê Amerîkayê re bi awayekî guncaw bi rêya Umanê hat şandin. Ev bersiva fermî Trump e dihewîne ku tê de nêrîna me ya derbarê rewşa niha û nameya Trump bi temamî hatiye zelalkirinû têde dîtinên me bi zelalî hatine kifşkirin. Siyasetên me hîn jî li ser redkirina danûstandinên rasterast di bin siyaseta zexta herî zêde û gefên leşkerî de ne, lê em dikarin danûstandinên nerasterast berdewam bike.”
Wezîr Arakçî amaje bi muzakereyên nerasterast ên bi Amerîkayê re yên di serdema herdu serokomarên berê Hesen Rûhanî û cîgirê wî Îbrahîm Raîsî de kir.
Uman navbeynkariya danûstandinên nerasterast li ser pirsa navokî ya Îranê di bin navê Xeta Muscat de kiribû. Arakçî di meha cotmehê de ragihandibû ku ev pêvajo “niha hatiye sekinandin.”
Di hevpeyvînekê de ligel Fox Business Network roja 7ê Adarê, Serokê Amerîka Donald Trump ragihandibû ku wî nameyek ji rêberê Îranê Elî Xamineyî re şandiye. Trump got, “Min ji wan re nameyek nivîsand û got, ‘Ez hêvî dikim ku hûn danûstandinan bikin ji ber ku heke em neçar bibin ku bi leşkerî meselê çareser bikin, ew ê tiştek tirsnak be.”
Xamineyî di axaftina xwe ya 8ê Adarê de got ku, Amerîka bi daxwaza xwe ya muzakereyê nexwaze pirsgirêkan çareser bike, daxwazên xwe ferz bike û serdestiyê pêk bîne û Îran vê yekê qebûl nake. Serokomarê Îranê Mesûd Pezeşkyan jî der barê gefên Trump ên di 11ê Adarê de wiha got: “Ji ber ku te ez tehdîd kiribûn ez bi we re muzakereyê nakim, hûn çi dixwazin bikin.”
